Причини и превенција од јаглеродни наслаги во моторот

Моторот, како „срцето“ на возилото, директно влијае врз перформансите и работниот век на автомобилот. Јаглеродните наслаги, како еден од најчестите „хронични проблеми“ кај моторите, тивко можат да влијаат врз возењето и работата на возилото.

Што предизвикува јаглеродни наслаги во моторот?

1. Нецелосно согорување на горивото 

Долготрајно работење во лер или возење на ниски вртежи:
Кога моторот подолго време работи на ниски обртаи, мешавината од гориво и воздух не се согорува целосно. Несогорените остатоци од горивото под влијание на високата температура создаваат јаглеродни наслаги кои се лепат на усисните вентили, комората за согорување и инјекторите.

Загаден филтер за воздух:
Валкан или затнат филтер за воздух го намалува протокот на воздух, го нарушува односот воздух-гориво и создава пребогата смеса, што доведува до нецелосно согорување.

Истрошени свеќички:
Истрошените свеќички со оштетени електроди создаваат слабo или неправилно палење, поради што смесата од воздух и гориво не согорува целосно.

2. Навлегување масло во комората за согорување 

Кај возила со поголема километража, истрошените клипни прстени или дихтунзи на вентилите можат да дозволат моторното масло да навлезе во комората за согорување. Бидејќи маслото потешко согорува целосно, се создаваат дополнителни јаглеродни наслаги.

3. Лош квалитет на гориво 

Горивото со понизок квалитет често содржи повеќе нечистотии, смоли и ароматични соединенија кои потешко согоруваат целосно. Како резултат на тоа, остануваат наслаги кои го забрзуваат создавањето јаглеродни наслаги во моторот.

Како да се спречи создавање јаглеродни наслаги

1. Создадете добри навики при возење 

Избегнувајте долготрајно работење на моторот во лер. Доколку возилото мирува повеќе од една минута, се препорачува моторот да се изгаси. Кај возила опремени со Start-Stop систем, препорачливо е функцијата да остане активирана.

2. Користете квалитетно гориво и моторно масло 

Секогаш точете гориво на проверени бензински станици и користете гориво со октански број препорачан од производителот. Следете ги упатствата од сервисната книшка и користете висококвалитетно моторно масло кое ги исполнува OEM спецификациите, со цел оптимално подмачкување и чистење на моторот.

3. Почитувајте редовен сервисен интервал  

Менувајте го моторното масло според препорачаните сервисни интервали и редовно проверувајте го или заменувајте го филтерот за воздух.

Редовно проверувајте ја состојбата на свеќичките и заменувајте ги согласно препорачаната километража.

Во зависност од начинот на користење на возилото и поминатите километри, повремено чистете ги деловите каде најчесто се создаваат наслаги, како што се телото на гасот, инјекторите и усисните канали.