Geely ја претстави хибридната технологија на метанол и првата сериска хибридна лимузина на метанол во светот

Претставувањето на новата технологија е значајна пресвртница во речиси дводецениската посветеност на Geely на метанолот како применливо, скалабилно и зелено алтернативно гориво за автомобилската индустрија.

Geely Xingyao 6 EF е хибридна лимузина со флексибилно гориво која може да вози на метанол, бензин или електрична енергија, при што метанолот и бензинот може да ги користи во кој било сооднос во ист резервоар. Оваа уникатна флексибилност на погонот ги решава клучните недостатоци на електричните возила во студена клима и истовремено нуди прагматичен мост кон пошироката примена на зелената мобилност.

Пробивање на бариерата на студената клима

Срцето на новата погонска технологија е хибридниот мотор на метанол на Geely, кој постигнува термичка ефикасност од 48,15 %, највисока меѓу сериски произведените мотори на метанол во светот. Моторот има директно вбризгување под висок притисок од 350 бари и моќен систем за палење, што овозможува сигурно ладно палење на температури блиску до –40 °C. Со тоа директно се решава проблемот со значителното намалување на автономијата што електричните возила го доживуваат во зимските услови во северна Кина.

Возилото е опремено и со сензор за концентрација на метанол, кој во реално време ја анализира мешавината на гориво врз основа на суптилни промени во електричната струја додека горивото минува низ сензорот. Контролната единица на моторот потоа соодветно ги прилагодува параметрите на вбризгување и палење, обезбедувајќи стабилна и ефикасна работа без оглед на соодносот меѓу метанолот и бензинот.

Перформанси и ефикасност

Според стандардот CLTC, Geely Xingyao 6 EF нуди 230 километри електрична автономија за секојдневно возење во градот. Комбинираната автономија со полн резервоар метанол и наполнета батерија изнесува приближно 1.250 km, додека со полн резервоар бензин и наполнета батерија се зголемува на 1.880 km.

Лимузината е изградена на глобалната интелигентна електрична архитектура GEA на Geely, долга е 4,8 метри, а меѓуоскиното растојание изнесува 2.756 милиметри. Опремена е со паметниот кокпит Flyme Auto, сеопфатен безбедносен пакет и каросерија составена од 71,6 % челик со висока цврстина.

Прагматични решенија за одржлива иднина

Посветеноста на Geely Auto Group на технологиите на метанол е дел од поширок пристап кон одржливата мобилност заснован на повеќе извори на енергија, вклучувајќи електрични, хибридни и водородни технологии. Компанијата инвестира во истражување и развој на метанол уште од 2005 година и изгради целосен синџир на вредност што опфаќа производство, складирање, транспорт и полнење метанол, како и негова примена во возилата.

Развојот на технологиите на метанол му дава на Geely Auto Group и предност во понудата на решенија за користење одржливи зелени алкохолни горива, како што се метанолот и етанолот, кои се користат на пазарите ширум светот. За дополнително да ја поттикне пазарната примена на зелениот метанол, Geely Auto Group разви и прв систем во светот за зафаќање јаглерод од издувните гасови на автомобилите, кој овозможува рециклирање на отпадниот јаглерод во зелен метанол, со што се создава затворен јаглеродно неутрален циклус.

Geely го позиционира моделот Xingyao 6 не како замена за електричните или конвенционалните хибридни модели, туку како комплементарно решение што пополнува важна празнина во одржливата зелена мобилност во студена клима и на долги релации.